أنيابك ناعمة
ح تعرف تخرج بهدوء من دمى زىّ ما دخلت ؟
وتسيب وراها تذكار ؛ نقط دم على شكل ورود حمرا صغيرة
ح تطرز الملاية البيضا
اللى ح أفرشهالك ع النار عشان تعدّيلى
نقف سوا
عريانين ...
عنيكى وعينى - من غير اىّ حائط صدّ -
يسيّحوا نظراتهم على نار هادية وخبيرة فى طهى القلوب
نبدّل أعضائنا مع بعض
آخد حلماتك مكان شفايفى وأعلمهم الصفافير
تاخدى قبضة من صدرى طفاية لنيرانك
ضلوعى جوانتى لمخالبك
قلبى حصّالة لصريخك
تسربى القطط العميا من صدرى
أطير بزازك بلالين ملوّنة ف السما
تطلقى عصافيرى الممنوعة من الطيران تحت جلدك
أنقش أنينى على جلدك بالحنّة
تجلدى الصحرا اللى ف ضهرى بخيول شعورك
تفيضى بدموعك ف بركة عينى
أسقى شجرتك الملعونة بعفاريتى
فواكه جسمك تنادى تعالب صوابعى
أفترسك زىّ حبر مكبوب ع اللبن
تنهشينى زى ريح ضريرة ف كوم ورق
ألضم لسانى ف لسانك ف طريق سريع لنقل الكلام التقيل ، ومن غير صوت
تعضى بسنانك لسانى عشان ما يحكيش اللى داقه
أكيد ح أفض اشتباكنا بسؤال برئ
عن إمكانية دخول الجنة من تحت باط النار .
No comments:
Post a Comment