رؤى

1/ أحمر

مونوكير فى صوابعها اللى بتغرزهم ف وحدتك ؟
أحمر شفايف إتلوّن بيه القلب لما باسته ؟
نبيت سكران بعنيها ؟
إشارة حمرا بتحذرك م العبور
ف الوقت اللى بتحرر حنينك م الإنتظار ؟
ولاّ دم طازة بينزّ من جرحك اللى جاى ؟




2/ ستوب ووتش

ظابط دقات قلبك ع الساعة
ورغم ده
مابطلتش تحب
من غير عدّ تنازلى للحظات فرحك
وعدّ تصاعدى لشهور وحدتك .




3/ أعلام

مارفعتش لسّة الراية البيضا ؟
رغم كل الرايات السودة اللى بتنذرك بالغرق
وخطر الشعبطة فى قلوب بجناحات مسافرة
ومدن بتختفى م الخرايط
وبتطلعلك ف الألبومات
مدن بعيدة قوى
وأعلامها بترفرف على قلبك المحتلّ .






الثلاثاء 29/ 3 / 2005
العاشرة مساءً القمرة







4/ حلم

نمت ، واستنيتك تجيلى ف الحلم
ماحصلش
صحيت ونزلت
لقيتك
هو انتى بجدّ
ولاّ انا اللى بامشى وانا نايم ؟!



5/ خيانة

إنتى ضد الخيانة ؟!
مضطر أكدب عليكى،
واخبّى علاقتى بيكى
عن وحدتى اللى باخونها معاكى .



6/ سُكْر

إزاى بتكرهى الخمورجية
وعنيكى ( حاملها وساقيها ) ؟!
ما تلوميش قلبى لو اتطوّح وهو خارج منهم .



7/ زحمة

بتعدّى الشارع مرعوبة
والشارع كان فاتح صدره ، ومنتشى ،
وقلبه كان بيوسع أكتر كل ما خطوتك تمدّ فيه
مش ذنبه إن الناس والعربيات
أفسدوا عليه خلوته .



8/ حقيقة

ممكن أجيبلها ورد ؟
بس إزاى ح أدارى خجلى من عيون صحابى ؟
سهلة .... ح أقول لهم ع الحقيقة
إنه مش أنا اللى جايبه
وإنى لملمته لمّا وقع من شفايفها
وهى بتضحك .




9/ نباتى

من خوفه من سهام الحب ومطاوى الفراق
ولمعرفته بعشقها للورد
مسخ نفسه ورقة شجر ،
بس كل خريف كان صحابه بيودّعوه ويطيروا
ويفضل هو مستنّيها ؛
ورقة واحدة
مش عايزة تقع
ومش قادرة تقف قدّام الهوا والتراب والوحدة .

لسنين طويلة
واقف دبلان وحيد
وحبيبته ما بتجيش
والورد ما بيطلعش
وماحدش قاله
إن الورد دلوقتى هايص معاها
بعد ما قدر يمسخ نفسه قلب إنسان !
................................
ياترى لو عرف
ح يقرر يمسخ نفسه وردة ؟!




10/ مظاهرة

حبكت مظاهرات دلوقتى
إشمعنى فى الميعاد ده ؟
وف الحتة دى بالذات ؟
وكل الناس دول مرة واحدة
وبدون اتفاق ولا يفط ولا هتاف
وكمية العساكر دى
من غير حواجز ولا خرازانات
وسياسة إيه بس
وكل واحد منهم مبتسم
وشايلى بوكيه ورد
ومتنّح للشباك اللى هى قاعدة وراه !



11/ ترانزيت

مش غريبة إنها تكلّمك عن خططها للسفر
وكأنها بوّظتلك كل مشروعاتك الوردية
ماهى الطيور المهاجرة
ساعات بتعمل ترانزيت
فى مدن مفهاش شجر .




12/ رصاص

بتكتب عنها بقلم رصاص
ليه ؟
خايف تغلط فى التعبير عن مشاعرك
ولاّ رغبة فى تحسين صورك عن صورتها ؟
ولاّ خايف تسافر وتسيبك مع قصايد يتيمة
تفضل تعيّط وتسألك عنها ؟
ويبقى أأمن لو تقدر بجومة تمسح مشاعرك البايتة
من غير ما تزعج بياض الوحدة .



13/ جنازة

رايح تودّع مين ؟
إيه الإخلاص ده كله ؟ !
ولاّ مش ح تلاقى فرصة أدفى من كدة
عشان تحتفل بميلاد أفراحك
وسط كل الناس الحزينة دى ؟



14/ قصايد

يعنى خلاص حبّيتها ؟
ولاّحافز للكتابة
طب إزّاى
ومافيش حد ح يقرا القصايد دى
حتى هى
بالذات هى .



15/ عبادة

يادى الكتابة
خلاص بقيت عبد تحت رحمتها
وبتقدّملها قرابين كل يوم
من قصايدك ، حزنك ، وحدتك ، فرحك المتخيّل ،
والناس اللى بتكتب عنهم
لدرجة إنك بتحب وإنت ضامن الفراق
طمعاً فى الكتابة مرتين .



الأربعاء 30 / 3 / 2005
الرابعة صباحاً القمرة



16/ قصيدة مشتركة

نامت وانا باقرالها شعرى
مازعلتش
بالعكس فرحت جدا
إنه ممكن نكتب سوا قصيدة مشتركة
أنا بخيالى
وهى بجمالها النايم .




17/ وحيد

مابتحبّش فريد ، ولا أنا
بس بقيت متعاطف معاه جداً ،
وفهمت سبب حزنه ويأسه والكآبة الشديدة
اللى بتطلع فى صوته لمّا بيغنّيلها .




18/ فراق

ماكانتش مضطرّة
تقوللى إنها عملت عملية تجميل فى مناخيرها
لإنى كنت سامع أنين الجزء اللى سابته
فى مستشفى بعيد عن عيونها .




19/ مجاز

بتزعلى لمّا شاعر يشبّه حبيبته بالسما مثلا
طب لمّا أشبهك بيكى
ح يبقى إيه لزمة الكائنات والحاجات التانية ؟!


20/ ظلم

دمعة فرّت من عنيكى
ذنبها إيه الناس تلومها على حزنك
ذنبها إيه تفارق عنيكى للأبد
ذنبها إيه وهى مجرّد دمعة فرح .





21/ إسكندرية

حبّتيها ؟
شوفتى البحر ؟
و ماخدتيش بالك م السمك
اللى انتحر وطلع ع الطريق الصحراوى
عشان يلحقك ؟!


الأربعاء 30 / 3 / 2005
السادسة مساءً القمرة



22/ مساواة

كنت معترض عليها جداً
فى كلامها عن المساواة بين الرجل والمرأة
لإنها ظلم كبير قوى للرجل
ولإنه من الطبيعى جداً
إنها تطالب بالمساواة بينها وبين الآلهة .


الخميس 31 / 3 / 2005
الثانية ظهراً المكتب



23/ بليد

إيه حكايته الهوا ؟
عمّال يطيّر الورق من قدّامى
غيران منى ؟
ولاّ بيغشّ كلمتين
يقولهم لك
لمّا يقابلك ف الشباك ؟



24/ أضرار التدخين

عمّ على البواب
كل يوم يصبّح عليّة عشان ياخد سيجارة
ويمسى عليّة عشان ياخد سيجارة
غريبة !
بقاله كام يوم مابيعبّرنيش
إيه زعلان منى ؟
ولاّ عرف إنك ضد التدخين ؟



25/ حلزون

إرتحتى لمّا عرفتى إنى باخاف أطلع
ع السلم الحديد الحلزون ف الضلمة ؟
وقعدتى تضحكى علية ؟
آهو السلم من يوميها
أنواره بتلعلط
وهو بيردّد ضحكتك .



26/ صديق

ح يسيبك ويسافر
وهو قلقان عليك
إزّاى ح تقعد لوحدك
و كنت بتطمّنه :
ماتخافش
أنا مش لوحدى
وعنيك بتغمز لصورتها ف المراية .



27/ مونودراما

عادةً الحب بيبقى ديودراما
يعنى إتنين بيأدّوا مسرحية سوا
لشخصيتين فى دراما واحدة
أنا كدة مضطرّ ألعب دورك بنفسى
وأسيب خيالى يلعب دورى
اللى حافظه صمّ وبدون ملقّن .



الخميس 31 / 3 / 2005
الثانية صباحاً القمرة



28/ فقد

سافرى
وماتاخديش ف بالك
أنا مش ح أزعل منك
وكمان مش أزعل عليكى
لإنى بفرحتى بيكى
حزنى فقد الذاكرة
ونسيت أساساً يعنى إيه حزن .

الجمعة 1 / 4 / 2005
الحادية عشر مساءً القمرة

29/ ذكرى

ح افتكرك طبعا
بس مش ح أستنّى ترجعى
لإنه مش معقول تطلقينى م القمقم
وأحبسك أنا ف خيالى .




30/ تذكار

لمّا تعوزى تتطمّنى عليّة
بصّى للصور اللى صوّرتهالك ف خيالى
ح تشوفينى مبسوط قوى
وأنا واقف ورا الكاميرا .




31/ قوس

عشان تعرفى إن حظّى حلو قوى
بصّى لحظّك اليوم ف أى جرنان
عرفتى قدّ إيه إحنا لسّة سوا ؟




السبت 2 / 4 / 2005
الواحدة صباحاً القمرة



حمدى زيدان
القاهرة 2005