رغم كل شئ
............
ضرورى دلوقتى أهجم ع القصيدة
مع مراعاة إنى باكتب دلوقتى ع الكومبيوتر
اللى مش عارف ح يفهم مشاعرى ف اللحظة دى ولاّ لأ !
لإن الورق غير شاشة الكومبيوتر غير شاشة التليفزيون
والحبر غير لوحة المفاتيح ومش لون الدم اللى بيطرطش ع الإزاز
الرغبة والتردد والكتابة كلهم محاولة للكتابة عن البحر على ورق نشّاف
new page
البكا مش عربية اسعاف
النخل مولّع زى عيدان بخور ولاّ شمع عيد ميلاد ؟
حدايق بابل المعلقة فى مرجيحة الرعب
عشتار بتسفّ التراب
أطفال زى دباديب فى حضن النار
مظاهرات السينما الصامتة
عدّاد الموت على شريط الدم الأحمر للبث المباشر
delete
مش ممكن يكون الشعر إنتهازى أكتر من كدة ؟
لإن القصيدة اللى مش ح تقدر تنقذ عيّل م الرصاص ح تنقذنى من الجنون .
مارس 2003 الإسكندرية
حمدى زيدان
don’t save
No comments:
Post a Comment