جواب

إلى أمل دنقل

فاكر أول قصيدة كتبتها على كراسة الإملاء ؟ أول مرة روحت القصر وسمعت عنك؟ كنت فاكرك شاعرة سودانية !! ولما شفت أعمالك مع بت شاعرة عامية لقيت وشك المنحوت ومش مترتّب زى جبل معمول عمولة زى بيت لسة واقع ـ بس لسة ع الحيطة البمبى صورة عريس وعروسة جُداد ـ كان عينك منورة لأول الشارع زى حريقة فكوم جرايد ، كان عينك مروّحة، يعنى م الآخر وبالكتير تدىّ على بيّاض محارة او فرّان صعيدى.

تفتكر أول سيجارة شربتها معاك فى المدينة الجامعية ؟ حتى طافية السيجارة وقعت على "لاتصالح"
وقفلت عليها الكتاب زى وردة الحبيبة!

كنت لسة متعلم ثقافة! ، ولسة بمضغ العروض . دلوقت بألّس ع العامودى وع اللى غرقان فى التفعيلة ، وبقولها ببجاحة : انا اللى خان الخليلى وكتبت نثر ! وهربت من غيببة الصور والمتاهة . ولسة برضه بيسمعونى و يسقفوا !!!

ساعات بعدى ع الترام الزرقا وشارع الإسكندر الإكبر وافتكرك ، و بلمحك محوّد على سور الترُب اليونانى وبكّسف انده عليك : أمل .. إنت بايت فين الليلادى؟

دوّرت عليك فى المستشفى اللى أنا إتحجزت فيها ، كل الأوض اللى مكتوب عليها"8" ومالقيتكش ! ، وستبلك خبر مع البنات ، ولما جمّ صحابى وجابوا سيرتك شخطت فيهم ، بس كان نفسى آخذ سيجارة.

هو الموت بعيد قوى كدة ؟؟ أمال إزاى لسة صوتك متشعبط ع الحيطان
متهيألى إنك علمتهم السهر أو عينوك غفير ع الباب عشان تسرب القصايد والسجاير .. تفتكر الغفير العجوز اللىكان مستنى حرامى عمره ماجه، وكان مستنى حاجات كتير ،زيك وزىّ ، كان متعشم يشمّ الشمس فى المخدّة ويكنس برد متنطور على الرصفان ـ العيال بعتروه من إيدين بتاع جرايد.

دلوقت أنا بقرا لناس ساكنة بعيد قوى ، ونشرت قصيدة ف إبداع ، وعندى ديوان فصحى مركون ، ولما باسمع الأخبار ع القهوة بتنرفز وأولّع سيجارة وأطلب ينسون .

لسة صوتك مجروش، وإيديك قروانه مونة وعش قوالب طوب أحمر ؟ ولسة بتكح قبل ماتلقط برد الإصطباحة وقبل غيار الريق بتحشى صدرك بحريقة وبتكعب الجزمة الى اسودّت م السنكحة وم المشورة ورا الحاجات ؟

أنا يا عم مش زيك ، ومش ناقص اسمىّ آخر شوراعى بإسمك ، أصلى لسة خارج يادوب م العراك مع المراية ومع سلم مرشوش ريش فراخ ، أكيد حتسأل بغلاسة : ياترى الفراخ طارت للسطوح عريانة؟!
زى عوايدك ؛ خشن زى فرحة ، وادفى م الخيبة
مايو 1994