قفلت وراها الباب
وعلّقت السهر ع الشيش
وقعدت تلعب بشوية المشاعر اللى لسة ما دبلتش
( باكرهك ... باحبك )
شفايفها المليانين نشفوا
من كتر السكات ؟
من قلة البوس ؟
ولا من خوفها لو إتنهّدت تخرج الذكرى من صدرها ؟
قاعدة منوّرة العتمة
ف ركن سريرها السادة
زّى فيلم فوتوغرافيا ف علبته السودة ولسة ماتحمّضش
بتلعب مع اللمبة الغمزة
وتشيش عيونها قدام لمض الشارع اللى بتدّخن
وتتخيل حريقة كبيرة بتتفسح ف لحم البيوت
قلوب مشوية ، جوابات قديمة بتطيّر سطورها فى سرب مع الدخان ، غناوى ساحت ع الشفايف
( انا باستنااااااااااااااك أنا ...........)
وتنبّت الزهور الزرقا اللى فى المخدة فوق راسها بشكل مخيف !
1 / 10 / 2001
اسكندرية
1 comment:
مش عارفة أعلق على ايه ولا ايه لكن البوست ده أنا حبيته جدا فيه أحاسيس جميلة وتعبيرات رائعة
.....لحم البيوت ...قلوب مشوية
غناوى ساحت ع الشفايف
روعة ياحمدى
Post a Comment